Ek het baie lanklaas so lekker geseil soos gister. Die wind was perfek, dit was nie te warn nie en ons het die heeldag sonder enige probleme op en af geseil. Ons het amper 40km ver geseil en as dit van ons afgehang het sou ons nou nog geseil het. Ons het uiteindelik nou ‘n volledige bemanning en al drie van ons geniet die seil ewe veel. Seil is ‘n span sport en dit is baie belangrik om as ‘n span saam te oefen. Elke beweging wat ‘n bemanninglid maak het ‘n invloed op die ander twee. Saam het ons drie maar min seilervaring en ons het nog ‘n hele paar oefensessies nodig voordat ons weer in die groot regattas kan kompeteer.

Oppad terug na 'n lekker dag se seil

Gisteroggend voordat ons op die water kon gaan, moes ons eers herstelwerk aan die ou sleepwa doen. Die ou geroeste sleepwa gee nog altyd moeilikheid en laas keer toe ons die boot uit die water sleep het daar ‘n stuk yster van die sleepwa af gebreek. Kevin – ons nuutste bemanningslid – is gelukkig heel vaardig agter ‘n swysmasjien en het syne saam gebring dam toe. Hy het sommer gou-gou die sleepwa weer kon herstel.

Kevin besig met herstelwerk aan die sleepwa

Ons gaan ongelukkig nou eers ‘n breek vat. John gaan Kaapstad toe vir sy kersvakansie en ek en Ester gaan ook ‘n ruk lank weg. So, ons volgende regatta sal die Om die Eiland wedvaart wees eers aan die einde van Januarie volgende jaar. Net so terloops, die Om die Eiland wedvaart is die grootste binnelandse regatta in die wêreld en in 2007 het daar 387 bote oor die eindstreep gevaar en ‘n nuwe wêreldrekord opgestel. Ek is bly om te kan sê ek was deel van hierdie wêreldrekord.

Besig om Top Notch op die sleepwa te kry

Ek kan nie wag om weer te gaan seil nie!