Nadat ons die roes afgeslaap het na die vorige aand se wynproe, terloops Phesantekraal se chenin blanc was loshande die wenner gewees, is ons laat oggend by Sanddrif weg om die berge te gaan verken vanuit die gerief van ‘n lugversorgde motorkajuit.

Ons het ‘n sirkelroete gery wat ons verby Algeria tot in Clanwilliam gevat het. Middagete het ons in die Clanwilliam hotel geniet. Vanaf Clanwilliam het ons Noord-oos gedraai oor die Pakhuispas gery en verby historiese nedersettings soos Wupperthal en Eselbank en weer terug tot by Sanddrif via Matjiesrivier.

Die pad is meestal grondpad en ons het verskeie passe oorgesteek waarvan die hoogste en steilste sekerlik die Eselbankpas is.

Die roete is sowat 175 Kilometer lank. As jy die regte voertuig het is dit die moeite werd om die roete te ry. Daar is ‘n verrassing om elke hoek en draai met asemrowende uitsigte.